جديد الموقع اسطوانات وزارة التربية والتعليم وتطبيقات للموبايل

تفريغ حلقة " اسجد واقترب " للشيخ حازم شومان (18 - 6 -2011 )

عرض المادة
تفريغ حلقة " اسجد واقترب " للشيخ حازم شومان (18 - 6 -2011 )
1422 زائر
05-01-2017

تخيلوا لو مجموعة من الطلبة داخلين محاضرة عادية ولسة علي إمتحان آخر السنة حوالي شهرين



دخل الدكتور قالهم كل واحد يشيل كتبه وطلعوا ورقة وقلم .. إمتحان فجائي



هيعرف كل طالب حقيقة مستواه وهل استعد ولا لأ ..... !!!










هو دا يا أخواني نفس اللي حصل من يومين لما كل الناس عرفت أن في خسوف للقمر ، ونزلنا كلنا صلينا الخسوف



دا امتحان فجائي قبل رمضان ، نزلنا كلنا صلينا الخسوف بما يقارب من جزء إلي جزئين قرءان



كل واحد فينا بقي عرف حقيقة مستواه



فيه اللي ساب الصلاة ومقدرش يكمل ، وفيه ناس ما نزلتش تصلي أصلا ، وفيه ناس من كتر تعب الوقوف مقدرتش تركز في الآيات وحسوا بالفتور في الصلاة



كل واحد فينا عرف هو فين ، هو جاهز يدخل رمضان ولا لأ ، ركعتين بس عينة علشان ربنا سبحانه وتعالي يوقظ قلوبنا علي أهمية الاستعداد




خسوف القمر بيتميز أنه بيكون القمر من ناحية والشمس من ناحية والأرض بتبقي في النص



علشان كدا ربنا أختاره في الآية لما قال "
وَخَسَفَ الْقَمَرُ (8) وَجُمِعَ الشَّمْسُ وَالْقَمَرُ (9)القيامه





يعني الأرض كانت في النص ومحتمل في أي لحظة أن الشمس تجمع علي القمر ، يعني القيامة كانت ممكن تبقي ساعتها












يا أخواني الأيام اللي أحنا فيها دي أيام في غاية الخطورة ، البرج اللي كانت الشقة فيه بمليون جنيه دلوقتي أوكازيون والشقة فيه بألف وألفين



قصوووور الجنة هتبقي متاحة



يا أخواني أحنا الأيام دي في أيام مباركة



1- في الأشهر الحرم : قال تعالي
" فلا تظلموا فيهن أنفسكم"}[التوبة : 36



2- بعد أيام هنبدأ في شعبان اللي بعتبره أخطر من رمضان ، آه رمضان أفضل من شعبان في مضاعفة الأعمال ، لكن شعبان أخطرررررر




دا صحيفة عملك طول السنة اللي فاتت دي هترفع في شعبان وهتعرض علي الله





الصحيفة اللي يوم القيامة هتلاقيها في الميزان



الصحيفة اللي في قبرك هتتسأل علي كل عمل فيها






دا حدث في غاية الخطورة ، محتاج شحذ همم ، الصحيفة بينك وبين رفعها أيااااام



المفروض أننا نختمها بإيه ، ونصلح الذنوب اللي فيها بتوبة شكلها إيه













لازلنا في الاستعداد القرءاني لرمضان ، كل سنة بندخل رمضان سلاحنا القرءان وأحنا مش فاهمينه ، بس إحنا عايزين المرة دي ندخل رمضان بسلاحنا المصحف وأحنا فاهمينه أو حتي فاهمين جزء منه



عايزين نحاول تجديد علاقتنا بالقرءان علشان ندخل رمضان في أساس نبني عليه ونعلِّي












هنتكلم اليوم عن سورة من أعظم سور القرآن ، ولو أنها من قصار السور ، لكنها السورة اللي عملت انقلاب في حياة رسول الله صلي الله عليه وسلم ، سورة بداية الكفاح ، أول خطوة في مشوار الألف ميل ، أول خطوة في مشوار الثلاثة وعشرين سنة كفاح ونضال من أجل نشر الكفاح في الأرض ، هنتكلم عن السورة اللي العالم قبلها غير العالم بعدها ، هنتكلم عن السورة اللي خلت النبي نبي عليه الصلاة والسلام





عرفتوا هنتكلم عن إيه ؟؟؟؟





سورة العلق .. سورة أقرأ .. سورة البداية





يا أخواني السورة دي دستور لكل واحد عايز يغير في الواقع ، المفروض العالم دا علشان يتغير عازين رجالة تقدر تقود قاطرة التغيير في العالم ، طب الرجالة دول نصنعهم ازاي ؟؟؟ السورة دي نازلة علشان الرجالة دول يتصنعوا



كل كلمة في السورة دي دستور لك ودستور لكي ، ولكل واحد نفسه أنه يغير ، وكل واحد ما كنش ليه دور في التغيير هيعرف من السورة دي ازاي يغير








اقْرَأْ

أول كلمة نزلت كلمة أقرأ ، دي أول كلمة نزلت في دينك ، دي أول كلمة نزلت في منهجك ، دي أول كلمة نزلت في خط سيرك ، دي اللي ربنا بدأ بيها ، يبقي اللي لازم تكون بداية رجوعنا إلي الله






أقرأ .. أقرأ القرءان ، أقبل علي كتاب ربنا





بعد أربعين سنة بحث عن طريق لتغيير العالم ، أخيرا خلاص الطريق أهو .. أقرأ



يا كل واحد عايز يوصل لربنا



يا كل واحده عايزة قلبها يتطهر



يا كل واحد عايز الدنيا دي تتغير



اقْرَأْ

أولها أقرأ وآخرها فاسجد واقترب



يبقي البداية أقرأ ، طب لما قرأت القرءان يارب كانت الثمرة إيه ؟؟



كانت منظر السجود ، ومنظر الترقي والصعود إلي الله



أقرأ نزلت قبل قم الليل قبل قم فأنذر ليييييييه ؟؟





أصل القلب وهو لسة مش مشحون ولسة مش متصل بالقرءان ما يقدرش يقوم ويناضل ويبذل ويضحي





فالبداية كانت أقرأ القرءان واستمسك بيه يا محمديا بن عبد الله أنت وكل واحد ووحدة هيتبعوك علي وجه الأرض





لما القلوب تتشحن بالقرءان ، ييجي الأمر قم الليل .. هنقوم ، قم فأنذر .. هنقوم



يا تري يا جماعة كام واحد فينا مطبق الكلمة دي ؟؟؟؟










أول كلمة في القرءان نزلت أقرأ آخر آية نزلت في القرءان "وَاتَّقُواْ يَوْماً تُرْجَعُونَ فِيهِ إِلَى اللّهِ"البقرة





كأنك هتفضل تقرأ وتقرأ وتعيش مع القراءن لحد ما توصل إلي القبر



ربنا لما قال قم الليل قالها مرة ، لما قال قم فأنذر قالها مرة ، لكن لما قال أقرأ قالها مكررة






لييييه يارب ؟؟





علشان القرءان مينفعش أنك تسيبه في يوم من الأيام ، ما ينفعش تنقطع عنه لأي سبب





أقرأ





الكلمة دي أنت هتسمعها مرة تانية عااااااارف فين ؟؟؟





يوم القيامة عي باب الجنة بس هتكون معاها كلمة تانية هتكون : أقرأ وأرتقي





هنكتشف ساعتها أن عدد درجات الجنة بعدد آيات القرءان ، وأن كل آية من آيات القرءان بترقيك درجة في الجنة ، الفرق ما بين الدرجة والدرجة زي الفرق ما بين الأرض والسماء



ياااااااااندمك علي كل آية فرطت فيها في الدنيا ساعتها



هنعرف ساعتها أن أقرأ هي سر الأرتقاء



كانت هترفعنا من الأرض إلي السماء في الدنيا



كانت هترفعنا من الأرض إلي السماء في الإيمان



كانت هترفعنا من الأرض إلي السماء في الحضارة الإسلامية في الدنيا



كانت هترفعنا من الأرض إلي السماء في العزيمة والفهم



وفي الآخر هترفعنا في درجات الجنة يوم القيامة



أقرأ وأرتقي ورتل فإن منزلتك عند آخر آية كنت تقرأها



تقرأها ... يعني كنت مداوم عليها وكانت مالية صدرك










أول سورة نزلت أولها أقرأ ، تاني سورة نزلت أولها قم الليل ، تالت سورة نزلت أولها قم فأنذر





يعني أولهم أفعال أمر أقرأ ، قم ، قم ،





كأن ربنا بيقولكم دا دين مش لعبة ، الدين دا يعني عبيد خاضعيين لأمر ملك













من أعظم القصص اللي قرأتها في شرح صحيح مسلم للإمام النووي رحمه الله



كان بيتكلم عن صحابي أسمه منقذ بن حيان الرجل دا كان سنة 6 هجرية ، كان جاي من قبائل ربيعة في البحرين للتجارة في المدينة ، النبي صلي الله عليه وسلم يروحله ويسأله عن نفسه وعن كل واحد من كبار قبيلة ربيعة ، ينبهر منقذ بن حيان بعلم النبي صلي الله عليه بالواقع فيسلم





يعلموا بقي النبي صلي الله عليه وسلم القرءان ، عارفين يعلموا إيه ؟؟





الفاتحة وأقرأ






يروح بيهم بقي بلده وكان متزوج بنت واحد من كبار القبيلة ، فضل قاعد يتوضأ ويصلي بالفاتحة وأقرأ ، و يتوضأ ويصلي





فراحت زوجته لأبيها قالتله علي حالته ، قام رحله ودعاه للإسلام فأنشرح صدره وأسلم ، وبعد إسلامة دخلت كل قبائل ربيعة الإسلام ، ويذهبوا رؤساء القبائل دي للنبي صلي الله عليه وسلم يخبروه بإسلامهم



يااااااااااااه شخص واحد تربي في مدرسة أقرأ أسلم علي إيده قبيلة بأكملها ، مش قلنا في البداية أن أقرأ دي بتبني الشخصيات والرجال














جبريل ينزل بعد أنقطاع للوحي لمدة 600 سنة ينزل علي النبي في الغار ، أول لقاء بين محمد وجبريل



أول مرة يسمع النبي كلام الله عز وجل





نزل جبريل عليه السلام بالخمس آيات دول من أقرأ





خمس آيات يا أخواني ياما سمعناهم في الصلاة ومتأثرناش بيهم





لكن في حياة النبي كانوا سبب انقلاب ، ترك التجارة وترك كل شيء وتفرغ للدعوة إلي الله





كل دا من الخمس آيات دول






الخمس آيات دول هم اللي صنعوا سمية الشهيدة وياما صنعوا زيها شهداء

الخمس آيات دول اللي خلوا ورقة بن نوفل الشيخ الكبير يقول يا ليتني كنت فيها حيا إذ يخرجك قومك ، يا ريتني أعيش وأنشر وأنصر الكلمات دي يا محمد












يا أخواني سبب تأخرنا في الطريق إلي الله هو البداية الغلط






سيدنا عمر لما أسلم حول طريق الدعوة من السرية للجهرية ، تغير كامل في تاريخ الاسلام بسبب إسلام واحد بدأ صــــــــح



خالد بن الوليد بعد اسلامة أتكسر تسع سيوف في أيده في بطولة معملهاش جندي في معركة في تاريخ البشرية .. لأنه بدأ صـــــــح



أبو بكر الصديق أول يوم في إسلامه ينتزع فلذات أكباد مكة ويجيبهم للإسلام بإذن الله ، لأنه اتربي علي أقرأ





وأنت ؟؟؟؟؟؟؟؟ وأنتي ؟؟؟؟؟؟؟





ملتزم بقالك أد إيه ؟؟ عملت أيييييييه ؟





عارف أيه سبب تأخرك ؟؟؟

البداية اللي مش صح



القرءان يا أخواني فين علاقتنا بكتاب الله؟؟









بِاسْمِ رَبِّكَ



يلا يا محمد يا بن عبد الله من النهاردة مافيش حاجة اسمها مش هقدر ما فيش حاجة اسمها ماينفعش



أي مهمة أنت مطالب بتنفيذها ولو كانت تغيير الكون



النبي يقول : ما أنا بقاريء



ما أنت بقاريء دي لو كنت هتقرأ بقدرتك









إنمااقْرَأْ بِاسْمِ رَبِّكَمن النهاردة أنت هتعيش بالله


الباء دي يا جماعة علماء اللغة بيقولوا اسمها باء الاستصحاب ، يعني هتعيش حياتك مع الله ، وفي قلبك دايما جلال الله


علماء تاني قالوا لأ دي باء استعانة ، يعني أنت من النهادرة هتتصرف بعون الله



من النهاردة أنت مع الله وبالله وإلي الله












أول ثلاث كلمات في القرءان
: أقرأ ، قم الليل ، قم فأنذر



يعني عـــلم ، عبــــــادة ، دعـــــوة



يا أخواني دا أبو الدرداح لما سمع قول الله
،، مَنْ ذَا الَّذِي يُقْرِضُ اللَّهَ قَرْضًا حَسَنًا ،،البقره









قال للنبي صلي الله عليه وسلم : أوَ يستقرضنا ربنا يا رسول الله ؟؟ بيسمع علشان يعمل



ولما نزلت آية الخمر شفنا الصحابة تفاعلوا معها أزاي





ولما نزلت آية الحجاب شفنا الصحابيات تفاعلوا معها أزاي



يا جماعة باسم الله يعني مش هنعلي غير اسم الله



هي دي كلمة السر اللي الكون كله عارفها



بتقول في الأذكار
" باسم الله الذي لايضر مع اسمه شيء
في الأرض ولا في السماء "
يعني كل الكون عارف اسم الله



يا أخواني القضية كبيرة قضية الافتقار إلي الله

















الَّذِي خَلَقَ









خلق إيييييه ؟؟



كل حــــــــاجة علي الأرض





طب ما قلش ليه الذي رزق ماهو ربنا برده اللي بيرزق كل المخلوقات ؟؟





لا.. أصلي رزق دي كل واحد يقولك أنا تعبت أنا عملت أنا رحت



لكن خلق دي محدش عرف يدعيها أبداااااا

حتي فرعون قال أنا ربكم ماقلش أنا خالقكم ، والنمرود قال أنا أحيي وأميت ماقلش أنا أخلق





مــــــــــــــايقدروش





الذي خلق يعني عبادة التدبر في مخلوقات الله





يعني أول سورة في القرءان فيها في دليل علي وجود الله باللآيات الشرعية في " اقْرَأْ " والآيات الكونية في " الَّذِي خَلَقَ "





يا أخواني عبادة التدبر دي اللي ربنا صنع بيها أنبياء












تعالوا نشوف الآية دي
وَلَقَدْ صَرَّفْنَا فِي هَذَا الْقُرْآنِ لِلنَّاسِ مِنْ كُلِّ مَثَلٍ

وَكَانَ الْإِنْسَانُ أَكْثَرَ شَيْءٍ جَدَلًا ( 54 )
"[‏الكهف‏





يعني يارب القرءان فيه كل حاجة .... أمال الناس تايها ليه ؟؟؟

علشان الإنسان بيحب الكلام الكتير والجدال

















مِنْ عَلَقٍ









يا تري ليه ربنا أختار علق ؟؟



عارفين ليه يا أخواني ؟؟




علشان علق دي هي أكتر مرحلة في النمو بتوضح فقر الإنسان وهو عامل زي الدودة





وكمان ربنا قال علق وماقالش علقة



يعني في أول مشهد منظر الخلق كلهم وهما زي الدود



كل البشر كانوا علق وهيظلوا علق



متعلقين برحمة ربنا



سبحان الله ربنا جعل في كل المخلوقات مش الإنسان بس مكان الحبل السري اللي كان رابطه في رحم أمه لما كان علقة ،





كأن ربنا بيقولك أوعي تنسي أنك كنت علقة ، أوعي تنسي فقرك ليا ، أوعي تستغني عني



طب ربنا ليه اختار العلقة وماخترش النطفة ؟؟؟؟؟



لأن كلام ربنا كله معجزات ، تعالوا نقارن بين العلقة هنا وبين النطفة في آية الكهف
أَكَفَرْتَ بِالَّذِي خَلَقَكَ مِن تُرَابٍ ثُمَّ مِن نُّطْفَةٍ
ثُمَّ سَوَّاكَ رَجُلًا } (37) سورة الكهف






الآية في العلق بتخاطب واحد مستغني ، مطلوب توصيل شعور الافتقار إليه ، فربنا جابله أفقر لحظة في حياته



إنما الآية في الكهف بتخاطب واحد مستكبر ، ومطلوب يوصله شعور الانكسار ، فربنا ذكره بأحقر مرحلتين في خلقه
















اقْرَأْ وَرَبُّكَ الْأَكْرَمُ









أقرأ تاني وتالت ماتبطلش قراءة



وربك الأكرم يعني إيه ؟؟




يعني مش هتاخد علي قد مجهودك ، دا أنت هتاخد أعلي وأعلي وأعلي مما تتخيل





كلمة تفتح باب الفرح بالله ، أنك تعرف أن ربنا مش بيعاملك بمجهودك ، ولكن بيعاملك بفتحه عليك ، بس أنت أبذل ، بس أنت قدم وخطي وربنا هيديك فوق ما تتخيل






ربنا بيقولك أقرأ القرءان وأفهمه وشوف أنا هفتح عليك أد إيه ، وهكرمك أد إيه



يعني معني الكرم دا معني مهم جدا في علاقتنا بربنا



ثلاث أسماء من أسماء الله فيهم معني الكرم : الكريم ، الأكرم ، ذو الجلال والإكرام



جسمك دا بيقولك أن ربنا الأكرم ، جسمك دا يكفي ربع كلية ونصف رئة ، ولكن ربنا أفااااااااض في خلقك


















الَّذِي عَلَّمَ بِالْقَلَمِ









دينا دين العلم يا أخواني ، في سورة الرحمن ربنا بيقول

"عَلَّمَ القُرْآنَ . خَلَقَ الإِنسَانَ "

يعني العلم جه قبل الخلق ، لأن إنسان بدون علم يبقي ضنك



زي الآية اللي قدمت المال علي البنون مع أن البنون أهم ، لكن بنون من غير مال يبقي ضنك وشقاء



تصوروا أن كل الصلوات فيها أمر بالتأني وعدم العجلة إلا صلاة الجمعة قال : فأسعوا ، يا تري ليه ؟؟؟



علشان فيها علــــــــم





ممكن كلمة تفوتك في الخطبة تكون هي دي اللي كانت هتدخلك الجنة












كان المتوقع بعد الخمس الآيات العظيمة دي أن الإنسان خلاص هيعيش خاضع مفتقر لربنا





وكـــــــــــــــــــــــ ــــــانت المفاجأة










كَلَّا إِنَّ الْإِنْسَانَ لَيَطْغَى (6) أَنْ رَآَهُ اسْتَغْنَى} [العلق/6،





مش اللي كان متوقع هو اللي حصل ، الإنسان بقي طاغية ، وشاف نفسه ، ودا سر ظهور العلمانية والليبرالية



أول ما حس أنه بقي حاجة قال هو أنا محتاج شرع ربنا في إيه أنا ممكن أعمل تشريع لنفسي



أكبر مصيبة في الدنيا للإنسان أنه يشوف نفسه ، هي دي بداية الإنهيار والدمار

















إِنَّ إِلَى رَبِّكَ الرُّجْعَى (8) العلق





يا كل واحد أستغني عن ربنا وعن شرعه ، كلكم راجعيين لربنا ، وساعتها هتعرفوا كويس قوي إيه اللي كنتوا بتعملوه في حق ربنا















أَرَأَيْتَ الَّذِي يَنْهَى * عَبْدًا إِذَا صَلَّى *
أَرَأَيْتَ إِنْ كَانَ عَلَى الْهُدَى * أَوْ أَمَرَ بِالتَّقْوَى *العلق



ربنا بيقول للنبي شايف ؟؟



أرأيت الذي ينهي المنتقبة عن نقابها ، أرأيت الذي ينهي أبنه علشان ألتزم بالسنة ، أرأيت الذين يحاربون الدين



معقووووووووولة ؟ يقفوا بين العباد وبين ربهم












كـَلا لئن لم يِّنته لنسَفعآ بآلنآصيِّه * نآصيِّه كـَآذبه خآطئه




الآية بتقولك ما تسكتش ، قول كلمة الحق





قوله ربنا هيرسله ملائكة تاخده من ناصيته تسحله في نار جهنم



السفع يعني السحب من مقدمة رأسه يترمي في جهنم



ناصيته اللي فكر بيها وخطط بيها وأتبع بيها طريق الغلط
















فَلْيَدْعُ نَادِيَه * سَنَدْعُ الزَّبَانِيَةَ




هاتوا أعلي ما في خيلكم





زباينة دي في لغة العرب يعني الشرطة ، بس شرطة جهنم بقي



والناقة الزبون هي الناقة اللي بترفص كل اللي يقرب منها





يعني السفع : كأنهم هيتجرجروا من الأمام علي جهنم ، والزبن هيدفعوا من الخلف إلي جهنم



ليييييييييييييه كل دا ؟؟؟





علشان وقفوا في طريق واحد بيدعو إلي الله



كل دا علشان نعرف قيمة الداعية عند الله














كَلَّا لَا تُطِعْهُ وَاسْجُدْ وَاقْتَرِبْ



أثبت وأوعي تتهز ولا تتأثر


أسجد يعني أنزل وأقترب يعني أقترب من ربنا في السماء



يعني كل ما تنزل في السجود بتطلع عند ربنا



طب واللي رفض يسجد واستكبر ، هينزل إن شاء الله في قاع جهنم













وفي النهاية يا أخواني أوعوا تتشغلوا بغير الله





كل اللي يحاول يشغلكم بالباطل ،سيبوه وأنشغلوا أنتوا بالله



ياااااااااااااااااااااا كل من حاسس أنه مش بيتأثر بالقرءان



ابدء الليلة ، حاول وجاهد مع نفسك



أنت لما يكون دراعك مكسور وفكيت الجبس فتحس أنك مش قادر تحرك إيدك ، لكن واحدة واحدة هتلين وهتتحرك



وقلبك كدا . هيلين وهيتحرك .. بس أنت حاول





نسأل الله أن يعيننا علي ذكره وشكره وحسن عبادته

   طباعة 
0 صوت
التعليقات
جديد المواد
جديد المواد
مش حتقدر تغمض عنيك - تفريغ دروس منوعه للشيخ **حازم شومان**
تفريغ درس " ماذا لو تكلم الكفن" - تفريغ دروس منوعه للشيخ **حازم شومان**
عايز بس مش قادر ...... الجزء الاول ؟!! - تفريغ دروس منوعه للشيخ **حازم شومان**
الافتقار إلى الله لد/شومان - تفريغ دروس منوعه للشيخ **حازم شومان**
القائمة الرئيسية
تلاوات تعليمية واحكام التجويد بالصوت والصورة


هل أعجبك هذا المحتوى ؟

>>> شارك الموقع مع أصدقاء على الفايسبوك والدال على الخير كفاعله <<<
facebook share islamic

إضغط هنا للمشاركة


هل أعجبك هذا المحتوى ؟

اسطوانات وزارة التربية والتعليم وتطبيقات للموبايل
Powered by: MktbaGold 6.6